ازاي تكسب كمصور من التصوير و تببع صورك ؟

ازاي تكسب كمصور من التصوير و تببع صورك ؟

لو عندك كاميرا جيدة بتصور بجودة عالية 

و حظك انك قريب من مكان فيه مناظر طبيعية او مواقع اثرية مشهورة عالميا 

فإنت النهاردة مع موعد مع فرصة تاريخية ليك لبيع انتاجك بشكل جيد و سليم  

لمواقع التصوير العالمية .. تعالوا نبدأ الشرح 

1 . الخطوة الأولى :  شرح الفكرة 

فيه مواقع على الإنترنت تصنيفها الرسمي Stock Photos 

.. بتبيع الصور و الرسومات و الفيديوهات عبر الانترنت

و مضمونة من حيث المصداقية جدا 

 حلو اوي ؟ طيب انا اعمل ايه ؟ 

- لو انت مصور ..  فإنت منتج هنا .. انت واحد بتصور صور حلوة و كويسة و جودة عالية 

سواء لمناظر طبيعية او اثار او مناطق سياحية 

و عليك فقط تمشى بخطوات معينة و شروط معينة عشان تسوق صورك هناك

و بعد كدة لو حازت صورك مرات تحميل , هتاخد ارباح

و فى النهاية انت مش خسران بالتأكيد

2 . الخطوة الثانية :  ايه المطلوبات للبداية ؟

بالنسبة لك لازم تكون عندك شوية مهارات و هي :

- اجادة لغة انجليزية بشكل كافي للتعامل مع المواقع دي  و فهمها بسهولة

- عندك كاميرا جيدة  سواء موبايل او كاميرا مستقلة بتصور صور حلوة

- فاهم مبدئيا موضوع التصوير و عندك هواية 

- بتمر او بتسكن قرب مناطق اثرية  او سياحية او ساحلية او قريبة من مناظر طبيعية 

( حدائق - شواطيء - مرتفعات جبلية - محميات طبيعية -  صحراء - حقول زراعية .. الخ ) 

3 - الخطوة الثالثة :  ايه شروط الصور ؟

لازم تعرف ان فيه شروط و سمات معينة لازمة فى الصور

و هى :

1)  الصورة لازم تكون مملوكة ليك ( و تقر بكدة )لو اتضح انها مش تبعك , مش هيكون ليك اي ارباح و هيتحظر حسابك 

2 ) الصورة لازم تكون جودة عالية ( قابلة للزووم بشكل حلو )( كل موقع بيحط حد ادنى لحجم الصورة و هتشوف بنفسك ) 

3 )  لو كان فى الصورة شخص او موديل .. لازم موافقة موقعة منه بانه سمح لك بتداول الصورة تجاريا و ادبيا

( يعني مثلا صورة مواطن او واحدة .. و ده منطقى )الموافقة لازم تكون موقعة على صياغة model release form

 طيب الارباح قد ايه ؟

على حسب في مواقع بتديلك عمولة 30% - 50% على كل تحميل لواحدة من صورك

( يعني مثلا الصورة سعرها على الموقع مثلا 10 دولار

.. بتاخد 5 دولار عن كل تحميل !! )

و بيكون فيه حد ادنى لسحب ارباحك ( غالبا 50 دولار على الاقل )

و اسرع وسيلة تحويل عن طريق الباى بال ( حساب امريكي او غير مصرى يفضل )

( و كل موقع و له وسائل متعددة فى التحويلات .. شوف بنفسك و دور و ان شاء الله مش صعبة و كل عقدة و ليها حل ‌‎smile‌‏ رمز تعبيري )

4- الخطوة الرابعة :  ايه أكتر صور مبيعا ؟

 طيب ايه افضل انواع الصور اللى بتتباع ؟

1 - صور المناظر الطبيعية :

يعني شمس , قمر , نجوم , صحرا , حدائق , نيل , جبال .. الخ الخ

2 - الجمادات العادية :

اللى هيا ممكن تستخدم للتصميم ... و على فكرة بسيطة جدا , يعني مثلا صورة اقلام و كتب !!! ( اه بجد ! )

بس تكون بجودة عالية طبعا و تنفع للتصميم

 .. صورة قلم .. صورة كوباية .. صورة كمبيوتر حلو .. صورة كتاب مدرسى .. صورة طبق فاكهة !!

3 - صور الاثار و المناظر الاثرية طبعا بأنواعها 

4 - الصور اللى ممكن تستخدم ارشيفية فى مواقع الاخبار , يعني لو صحفي و مصور و حابب تبيع صور مش منشورة ليك و حاسسها تنفع تستخدم كصور ارشيفية .. و دي صعبة شوية بس حاول فيها

5 - صور البورتريه .. يعني صورة كذا شخص او شخصين ..

صعايدة وراهم حقل .. صيادين وراهم بحر .. كدة

 ملحوظة اخيرة و تحذير مهم جدا  :

ممنوع طبعا الصور اللى ملعوب فيها بأى شكل فوتوشوبي او تم تحريرها بأى برنامج تحرير صور .. لأن كدة ما تبقاش صور خام

5 - الخطوة الخامسة:  اشهر المواقع دي ايه ؟

تعالوا نشوف 

Stock photo 

http://www.istockphoto.com/

Fotolia

http://www.fotolia.com/

123rf

http://www.123rf.com/

shutterstock 

http://www.shutterstock.com/

Canstock

http://www.canstockphoto.com/bigstock

http://www.bigstockphoto.com/

و طبعا التسجيل فى المواقع دي سهل جدا زي كأنك بتعمل ايميل بالضبط :D

و كذلك رفع الصور , و استلام الاموال بيختلف من موقع للتاني :D

لهذا  قلنا عشان ما نطولش عليكي , نشرح الاساسيات 

و هتلاقي لو لغتك الانجليزية كويسة ان الخطوات و التسجيل سهلة جدا 

و تقدر تقرا  بوضوح شرح  كتالوج الموقع من FAQ  لكل موقع بسهولة 

تشرحلك و تجاوبك على اساسيات الموقع و نسب الارباح و غير ذلك 

لو واجهك اي عائق فيه ابعتلنا فى التعليقات و هشوف المشكلة ايه و وسيلة حلها :)

او ادخل اي جروب من جروبات الواتس وارسل لي : اضغط هنا للاشتراك في جروب الواتس

و انت و شطارتك و ربنا يوفقك ‏ :)

بالتوفيق دايما :)